top of page

25歲Kylie C.鄭杞瑤電暈「藍仔頭」 擁滿分身段仲係史詩級學霸?

由「熊仔頭」和「藍仔頭」主理的YouTube頻道FHProductionHK一向「重女」,不但捧紅了嘉盈(Kaying,王嘉盈)、Santis(陳濬樺)等網絡女神,他們製作的長壽短片系列「拍一日拖」更深受網民歡迎。日前,FHProductionHK上載了最新一集的「拍一日拖」,片中除了鐵膽「藍仔頭」亮相,還有首次平台出現的新紮女神Kylie C.(鄭杞瑤),Kylie C.甫出場便電暈見慣大場面的「藍仔頭」,搞到口窒窒的他只好賴自己眼瞓:「平時我做開主導㗎嘛,今日無啦啦俾人主導返轉頭,我覺我自己好似一個唔識講嘅人」、「搞到我個心係咁跳」。雖然覺得「藍仔頭」比想像中冇咁好笑,但Kylie C.與對方整完蠟燭和聖誕裝飾後,便指約會都好開心:「如果佢再約我出街,我都會再應約,幾開心,成個過程好開心,希望佢下次可以同我傾多啲偈。」



到底令出名轉數高的「藍仔頭」窒機的Kylie C.係咩來頭?現年25歲的Kylie C.原來今年羸得唐安麒擔任星級評判的Ace Talent模特兒冠軍及演藝賽亞軍,除了冠軍級人馬,她還是一名學霸,大學時修讀犯罪心理學,畢業後任職行為治療師幫助自閉症小朋友,既精通西班牙文,亦略懂韓文、日文及德文,非常犀利。除了模特兒工作,Kylie C.早前亦有亮相ViuTV節目《水著考有Feel》大玩水上遊戲,令不少觀眾睇到「心心眼」。

Comments


bottom of page